Mikill samdráttur útflutningsverðmæta
Setja bókamerki
Útflutningsverðmæti sjávarafurða nam 26,9 milljörðum króna í október samkvæmt bráðabirgðatölum sem Hagstofan og er það tæplega 14% samdráttur miðað við sama mánuð á síðasta ári. Vakin er athygli á því í greiningu Radarsins að gengi krónunnar hafi að jafnaði verið rétt rúmlega 1% lægra í október síðastliðnum en í sama mánuði í fyrra og er samdrátturinn því aðeins meiri í erlendri mynt, eða tæp 15%.
Fram kemur að útflutningsverðmæti flestra afurðaflokka dróst saman á milli ára í október, að ferskum, söltuðum og þurrkuðum afurðum undanskildum. Þannig var rúmlega 2% aukning í útflutningsverðmæti ferskra afurða á milli ára og rétt um 1% aukning á söltuðum og þurrkuðum afurðum.
Mesti samdrátturinn er í fiskimjöli og var útfluttningsverðmæti þess í október 1,3 milljarður sem er 2,3 milljörðum minna en í sama mánuði á síðasta ári, nemur samdrátturinn 63%. Næst mest munar um heilfrystan fisk og minnkar útflutningsverðmæti slíkra afurða um 22%. Á eftir fylgir flokkurinn aðrar sjávarafurðir sem dragast saman um 26%, en undir það heyra t.a.m. loðnuhrogn. Þá drógust útflutningsverðmæti rækju saman um 26%, lýsi um 5% og frystum flökum um 5%.
Á fyrstu tíu mánuðum ársins nema útflutningsverðmæti sjávarafurða um 280 milljörðum króna sem er rúmlega 6% samd´rattur frá sama tímabili í fyrra, að teknu tilliti til gengisbreytinga. Samd´rattur hefur orðið í öllum afurðaflokkum, að heilfrystum fiski undanskildum, en þar er aukning upp á rúm 15% á milli ára á föstu gengi.
Viðbótarkvótinn barst seint
„Þar sem einungis er um fyrstu bráðabirgðatölur að ræða í október liggur sundurliðun niður á tegundir ekki fyrir í mánuðinum, en miðað við þróunina á fyrstu 9 mánuðum ársins má gera ráð fyrir að grálúða og loðna spili stórt hlutverk í téðri aukningu. Þetta er þó eflaust eina tilfellið sem loðnan hefur áhrif til hækkunar, enda eru aðrir afurðaflokkar þar sem hún er fyrirferðarmikil að dragast saman á milli ára. Ber hér fyrst að nefna flokkinn „aðrar sjávarafurðir“ þar sem loðnuhrogn koma við sögu. Þar er samdráttur upp á tæp 25% á milli ára. Hann skrifast að stærstum hluta á verulegar verðlækkanir á loðnuhrognum sem má rekja til þess hversu mikil framleiðslan var. Það má svo aftur rekja til hversu miklu var bætt við loðnukvótann rétt í þann mund sem verðmætasti hluti loðnuverðtíðarinnar var að hefjast,“ segir í greiningu Radarsins.
Fullyrt er að hefði viðbótarkvótinn í loðnu sem gefinn var seint út fengist fyrr hefði mun meiri afla verið ráðstafað í bræðslu. „Þetta hefur jafnframt orðið til þess að talsverður samdráttur er í útflutningsverðmæti á fiskimjöli og lýsi á milli ára, eða samanlagt um 12% á föstu gengi.“
Þá varð 11% samdráttur í í útflutningsverðmætum frystra flaka á fyrstu tíu mánuðum ársins miðað við sama tímabil í fyrra. „Þar má telja að samdráttur í veiðum á ufsa eigi stærstan hlut en um þriðjungs samdráttur var í ufsaafla á fyrstu 10 mánuðum ársins miðað við sama tímabil í fyrra.“
