Veiðum ísfisktogaranna Bergs VE og Vestmannaeyjar VE er nú stýrt þannig að mun meiri takmarkanir eru settar á aflann sem veiddur er hverju sinni en áður. Ástæðan er að ekki er unnt að landa afla til vinnslu í Grindavík.

Bergur VE  kom til löndunar í Vestmannaeyjum í gærkvöldi með 65 tonna afla. „Þetta var mest ýsa og þorskur sem fékkst á Gula teppinu og á Breiðdalsgrunni,“ segir Jón Valgeirsson, skipstjóri á Bergi VE, í færslu á vef Síldarvinnslunnar.

„Veður var ágætt í túrnum. Þetta var skammturinn sem við máttum taka en lokunin hjá Vísi í Grindavík hefur veruleg áhrif á það hvernig veiðum hjá okkur er háttað,“ sagði Jón.

Vestmannaey VE kom til hafnar í morgun með 60 tonna afla. Ljósmynd/Síldarvinnslan: Guðmundur Alfreðsson

Vestmannaey VE lagði svo að bryggju í Vestmannaeyjum í morgun með 60 tonn. „Við máttum taka ákveðinn skammt sem ákveðinn er í samræmi við stöðuna í Grindavík. Aflinn hjá okkur var mest ýsa. Við tókum eitt hol út af Hornafirði en síðan var veitt á Breiðdalsgrunni og Skrúðsgrunni. Það var þokkalegt nag yfir daginn en rólegri veiði á nóttunni,“ segir Birgir Þór Sverrisson, skipstjóri á Vestmannaey, í færslunni.

Gert er ráð fyrir að Bergur haldi til veiða á ný á morgun en ekki er vitað með vissu hvenær Vestmannaey heldur til veiða.

Tengdar fréttir

Eldvirkni á Reykjanesskaga

Grindavík á varaafli á fimmtudag

• Tímabundin lokun framlengd til 7. desember
• Landvinnsla er hafin á ný hjá Þorbirni í Grindavík
• Fleiri ráðherrar kynna sér aðstæður í Grindavík
• Hundrað smáskjálftar í nótt

» Fleiri tengdar fréttir

• Blogga um frétt