Íbúum boðið að skoða nýjan Baldur

Formleg móttaka ferjunnar Baldurs verður haldin í Stykkishólmi í dag klukkan 15:00 til 17:00. Þá gefst íbúum og öðrum áhugasömum tækifæri til þiggja kaffi og kökur um borð í skipinu og skoða farþegarými skipsins, að því er fram kemur í færslu á vef Vegagerðarinnar.

Íbúar norðan megin Breiðafjarðar fá tækifæri til að skoða ferjuna í Brjánslæk, sunnudaginn 19. nóvember milli klukkan 17:00 og 18:00.

Í færslunni er bent á að saga Breiðafjarðarferjunnar Baldurs er löng og að skip með þetta nafn hefur nýst til ferjusiglinga í nærri heila öld. Þess vegna hafi þótt við hæfi að ferjan Röst frá Noregi fengi einnig nafndið Baldur er Vegagerðin festi kaup á henni.

„Upphaflega stóð til að leggja af ferjusiglingar á Breiðafirði við lok samnings við Sæferðir vorið 2023 en ákveðið var breyta þeirri ákvörðun og  halda áfram siglingum, meðal annars í ljósi þess að miklar breytingar hafa orðið á atvinnustarfsemi á sunnanverðum Vestfjörðum með uppbyggingu fiskeldis og aukinna umsvifa í ferðaþjónustu við Breiðafjörð. Einnig er ferjan mikilvæg fyrir íbúa Flateyjar þar sem skipið flytur nauðsynjar til eyjarinnar og er aðalferðamáti ferðafólks sem vill heimsækja Flatey og dvelja þar til skemmri eða lengri tíma,“ segir í færslunni.

Frétt af mbl.is

Tafir vegna stórrigninga

• Blogga um frétt