Gera hlé á síldarveiðum

Margrét EA, skip Samherja, landaði 1.300 tonnum af íslenskri sumargotssíld í Neskaupstað í gær og kom Beitir NK þangað rétt fyrir klukkan þrjú síðdegis í dag með þúsund tonn.

„Þessi túr gekk býsna vel. Við fengum aflann, um 1000 tonn, í þremur holum um 70 mílur suðvestur af Malarrifi. Þetta er sama góða síldin og verið hefur og þetta er síðasti síldartúr hjá okkur í bili,“ segir Tómas Kárason, skipstjóri á Beiti, í færslu á vef Síldarvinnslunnar.

Fram kemur að síldarkvóti skipa Síldarvinnslunnar sé langt kominn og að gert sé ráð fyrir að hlé verði gert á veiðum fram í desember. Samkvæmt skráningu Fiskistofu hafa íslensku uppsjávarskipin landað 61.644 tonnum af íslenskri sumargotssíld af 93 þúsund tonna síldarkvóta sem úthlutaður var.

Vinnsla gengið vel

Vel gengur að vinna íslensku sumargotssíldina í fiskiðjuveri Síldarvinnslunnar í Neskaupstað, að sögn Geirs Sigurpáls Hlöðverssonar rekstrarstjóra. Nú er mest verið að heilfrysta og framleiða samflök.

Í færslunni á vef útgerðarinnar segir hann: „„Síldin er hið besta hráefni í alla staði. Þessi framleiðslutörn er orðin alllöng. Fyrsti síldarfarmurinn að vestan barst til okkar þann 24. október en þá var veiðum á norsk-íslenskri síld austur af landinu að ljúka. Nú eru komin til okkar um 16.000 tonn af íslenskri sumargotssíld.“

• Blogga um frétt