„Ég setti mjög öfluga suðumenn í verkið“

Starfsmenn á vélaverkstæði Loðnuvinnslunnar á Fáskrúðsfirði hafa haft nóg að gera og fengu nýverið það verkefni að styrkja toghlera Hoffells SU-80. Þetta er ekki lítið verk enda vegur hver toghleri um fjögur tonn.

Haft er eftir Ingimari Óskarssyni, verkstjóra á vélaverkstæðinu, í færslu á vef Loðnuvinnslunnar að það sé ekki á hverjum degi sem unnið er að því að styrkja átta tonn af toghlerum. „Ég setti mjög öfluga suðumenn í verkið og þeir voru aðeins rúmlega einn vinnudag að föndra þetta,“ segir hann.

Á verkstæðinu er sagður vera „valin maður í hverju rúmi“ og voru þeir Arnar Ingi Ármannsson, Lúðvík Héðinn  Gunnarsson og Krizysztof Kaluziak fengnir í verkið enda afar fimir með suðutækin.

„Það er dýrmætt fyrir Loðnuvinnslunna að innan fyrirtækisins sé sá mannauður sem raunin er og hægt sé að leysa flest verk hér heima hvort heldur það snýr að vélum eða tækjum eða meðhöndlun á afla,“ segir í færslunni.

Toghlerarnir eru ekkert smá apparat, fjögur tonn hver. Ljósmynd/Loðnuvinnslan: Ingimar Óskarsson

Ljósmynd/Loðnuvinnslan: Ingimar Óskarsson

Hoffell SU Ljósmynd/Loðnuvinnslan

• Blogga um frétt