Stöðvaði starfsemi Hríseyjar Seafood

Matvælastofnun stöðvaði starfsemi matvælafyrirtækis á Norðurlandi eystra í síðustu viku.

Þetta kemur fram í tilkynningu frá Matvælastofnun.

Ríkisútvarpið greinir frá því að stofnunin hafi lokað fiskvinnslunni Hrísey Seafood tímabundið.

Brot á matvælalögum

Í tilkynningu Matvælastofnunar segir að við eftirlit hafi komið í ljós mörg alvarleg frávik sem fólu í sér brot á matvælalögum og reglugerðum byggðum á þeim sem settar eru til að tryggja öryggi og heilsu neytenda.

Jafnframt segir að stofnunin geri kröfur um umfangsmiklar úrbætur og verði starfsemin ekki leyfð að nýju fyrr en orðið hefur við þeim. Að auki hafi fyrirtækið verið fellt úr frammistöðuflokki B niður í frammistöðuflokk C sem felur í sér strangara eftirlit þegar starfsemin hefst að nýju, segir að lokum.

• Blogga um frétt