Það er fyrirtækið Kleifar fiskeldi sem stendur að þessu verkefni, en í fyrirsvari fyrir það félag er Róbert Guðfinnsson, stofnandi Genís og einn eigenda Hólshyrnu. Einnig kemur Árni Helgason verktaki í Ólafsfirði að verkefninu, ásamt öðrum fjárfestum.

Ætlunin er að eldið verði þríþætt; seiðaeldi á Siglufirði, landeldi í Ólafsfirði og áframeldi í sjókvíum í fjörðum á Tröllaskaga. Talið er að fimm ár taki að koma eldinu á laggirnar, eftir að öll tilskilin leyfi hafa fengist.

Óskað hefur verið eftir burðarþolsmati á Siglufirði, Héðinsfirði, Ólafsfirði og Eyjafirði, en skoðaðir verða möguleikar á eldiskvíum í fjörðunum.

Sjö nærliggjandi sveitarfélögum verður boðinn um 1,4% hlutur í Kleifum endurgjaldslaust, eða samtals 10,1%. Hlutabréfin verða í hlutabréfaflokki sem fær arðgreiðslur og er varinn gagnvart þynningu, en án atkvæðisréttar og óheimilt verður að framselja bréfin.

„Þannig munu sveitarfélögin sem gefa samþykki sitt fá 10,1% af öllum arðgreiðslum félagsins um ókomna framtíð. Við ætlum að tryggja það að sveitarfélögin fái sinn skerf og að ekki gerist aftur það sama og þegar kvótakerfið í sjávarútvegi var endurskipulagt með tilheyrandi hagræðingu, að sveitarfélögin sátu eftir tekjulaus,“ segir Róbert Guðfinnsson í samtali við Morgunblaðið.

Lesa má meira um málið í Morgunblaðinu í dag. 

Tengdar fréttir

Fiskeldi

Milljarðarnir streyma til Eyja

• MAST samþykkir stækkun seiðaeldis
• Ný vefsíða um skaðleg áhrif laxeldis
• Vilja takmarka erlent eignarhald í eldi
• Daníel tekur við forstjórastöðunni

» Fleiri tengdar fréttir