Samherji hlaut verðlaun fyrir framúrskarandi árangur

Samherji hlaut Íslensku sjávarútvegsverðlaunin í gærkvöldi fyrir fiskvinnsluhús fyrirtækisins á Dalvík.

Verðlaunin eru veitt fyrir framúrskarandi árangur í sjávarútvegi.

Þetta kemur fram í tilkynningu frá Samherja.

Íslenska sjávarútvegssýningin 2024, Ice Fish 2024, var formlega sett í gær en fjörutíu ár eru liðin frá því sýningin var fyrst haldin hér á landi og eru nú mættir sýnendur frá rúmlega tuttugu þjóðlöndum til að kynna allt það nýjasta og besta í alþjóðlegum sjávarútvegi.

Segir í tilkynningu Ice Fish um verðlaunin að Samherji hafi reist eitt fullkomnasta fiskvinnsluhús heims á Dalvík, þar sem fyrirtækið framleiðir hágæðaafurðir fyrir alþjóðlega markaði.

Ein fullkomnasta bolfiskvinnsla í heiminum

„Við erum afskaplega stolt af þessum verðlaunum. Um þessar mundir eru fjögur ár síðan við hófum vinnslu í nýja húsinu og fullyrðum að um sé að ræða eina fullkomnustu bolfiskvinnslu í heiminum. Búnaðurinn er að mestu íslenskur og hönnun og útfærsla á mörgum þáttum starfseminnar er ný af nálinni. Húsið hefur vakið verðskuldaða athygli víða um heim og þessi verðlaun undirstrika að okkur hefur greinilega tekist vel til,“ er haft eftir Gesti Geirssyni, framkvæmdastjóra landvinnslu Samherja.

Þá segir Guðbjörg Ósk Sveinsdóttir, gæðastjóri Samherja, að vinnslan á Dalvík sé glæsilegt dæmi um nýsköpun, frumkvöðlastarf og góðan aðbúnað. Allt kapp sé lagt á að uppfylla kröfur viðskiptavina og því sé fylgst vel með framleiðslunni á öllum stigum.

Guðbjörg Ósk Sveinsdóttir gæðastjóri Samherja, Marianne Rasmussen-Coulling, framkvæmdastjóri IceFish 2024 og Gestur Geirsson framkvæmdastjóri landvinnslu Samherja. ljósmynd/ Birgir Ísleifur Gunnarsson

• 1 blogg um fréttina

Bloggað um fréttina

• Guðmundur Örn Ragnarsson: Samherji, til hamingju!