400 tonna hal af norsk-íslenskri síld

Síldarvinnslan í Neskaupstað fékk mest úthlutað eða rúm 12.300 tonn og þar á eftir Ísfélagið í Vestmannaeyjum með ríflega 11.600 þúsund tonn.

Eyþór Harðarson útgerðarstjóri hjá Ísfélaginu í Vestmannaeyjum segir að veiðar hafi gengið vel þótt veður hafi sett strik í reikninginn.

„Frá því veiðar hófust í septemberbyrjun á norsk-íslensku síldinni hefur veiðin hjá skipum okkar gengið ágætlega. Uppsjávarskipin okkar hafa veitt um það bil 7 til 8 þúsund tonn og eiga eftir að veiða um 5 þúsund tonn,“ segir Eyþór í samtali við Morgunblaðið.

Fínasta síld

Hann segir að veður hafi sett svip sinn á veiðarnar en síðan hafi rofað til.

„Í fyrri hluta september voru leiðindabrælur á miðunum, sem gerði veiðarnar aðeins erfiðari, en í síðustu viku var fínt veður og skipin fundu meira magn aðeins sunnar en verið hefur,“ segir Eyþór.

Aðspurður segir hann að bæði sé stutt á miðin, eða 20 til 30 sjómílur frá landi, og í löndunarhafnir.

„Það er mjög stutt fyrir skipin að fara á miðin hérna fyrir austan land. Það er einnig stutt fyrir þau að fara í næstu löndunarhöfn okkar á Þórshöfn og fyrir Austfirðingana er það jafnvel enn styttra,“ segir Eyþór.

Hann segir aðspurður að þetta sé fínasta 350 til 400 gramma síld og það hafi verið mokveiði í fyrradag.

„Sigurður VE var að taka 300 til 400 tonna hal af síldinni þannig að það er ekki hægt að kvarta undan svoleiðis veiði,“ segir Eyþór.