8% samdráttur í útflutningi

Það mun vera 8% samdráttur í krónum talið, miðað við ágúst á síðasta ári.

Þá hafði lækkun á gengi krónunnar í ágúst sín áhrif, eftir hafa verið fremur stöðug framan af ári. Af þeim sökum var samdrátturinn í ágúst meiri mældur í erlendum gjaldeyri eða tæp 13%.

Í greiningu Radarsins kemur fram að samdráttinn megi rekja til flestra vinnsluflokka, útflutningsverðmæti þeirra allra dróst saman á milli ára í ágúst, að tveimur flokkum undanskildum.

Til að mynda dróst útflutningsverðmæti á frystum flökum saman um fjórðung á föstu gengi og nam alls 4,4 milljörðum í ágúst.

Þá dróst útflutningsverðmæti fiskimjöls saman um 28% og nam verðmæti þess um 3,1 milljarði í nýliðnum ágústmánuði.

Mestur samdráttur var í útflutningsverðmæti saltaðra og þurrkaðra afurða sem dróst saman um 58% á milli ára. Verðmæti þeirra nam um 760 milljónum króna í ágúst, en það hefur ekki verið minna í einum mánuði síðan Hagstofan hóf mælingar, eða frá janúar 2002.

Minni samdráttur var í öðrum flokkum, ferskum afurðum (6%) og heilfrystum (9%).

Ágúst var hins vegar stór mánuður í útflutningi á lýsi og nam útflutningsverðmætið um 4,3 milljörðum króna sem er 29% aukning á milli ára á föstu gengi.

Góð aukning var einnig í útflutningsverðmæti rækju sem jókst um 16% á milli ára en það hefur litla vigt í heildarsamhenginu, segir í greiningu Radarsins.