Bergur og Gullver með fullfermi til Seyðisfjarðar

Togararnir Bergur VE og Gullver NS hafa báðir landað fullfermi á Seyðisfirði, að þvi er fram kemur í færslu á vef Sídlarvinnslunnar.

Fyrst landaði Bergur og kom hann til hafnar í gærkvöldi eftir veiðar á Gerpisflaki og á Gula teppinu. Í færslunni er haft eftir Jóni Valgeirssyni skipstjóra að aflinn hafi mest verið ýsa.

„Segja má að túrinn hafi gengið vel í alla staði,” sagði Jón, en Bergur hélt á ný til veiða að löndun lokinni og er nú staddur við Norðfjarðardjúp.

Þá mætti Gullver til Seyðisfjarðar í morgun og segir Hjálmar Ólafur Bjarnason skipstjóri að í túrnum hafi verið gott kropp og smáskot þess á milli. „Við vorum á Gerpisflakinu meirihlutann af túrnum en enduðum síðan á Herðablaðinu. Aflinn var nánast eingöngu ýsa og þorskur,” segir Hjálmar.

Gert er ráð fyrir að Gullver haldi til veiða á ný á miðvikudagskvöld.

Vestmannaey VE landaði síðan í Neskaupstað í morgun og var uppistaða aflans ýsa. Mun Vestmannaey halda til veiða að löndun lokinni en ráðgert er að bæði Bergur og Vestmannaey landi aftur á fimmtudag.

Vestmannaey landaði í NEskaupstað. Ljósmynd/Síldarvinnslan: Smári Geirsson

• Blogga um frétt