Daði Þorsteinsson nýr útgerðarstjóri Eskju

Daði Þorsteinsson hefur verið ráðinn útgerðastjóri hjá Eskju, en hann hóf störf síðastliðinn föstudag að því er segir í tilkynningu á Facebook-síðu Eskju. Hann tekur við starfinu af Baldri Einarssyni.

Fram kemur að Daði sé fæddur og uppalin á Eskifirði og býr þar ásamt fjölskyldu sinni. Hann útskrifaðist með skipstjórnarpróf frá Stýrimannaskólanum í Reykjavík árið 1998 og hóf þá störf sem stýrimaður á Hólmaborginni og leysti af sem skipstjóri. Hann hefur verið starfandi sem skipstjóri á Aðalsteini Jónssyni frá árinu 2006. Daði hefur verið viðloðandi fyrirtækið allt sitt líf og unnið þar meira og minna í rúm 35 ár.

Eskja gerir út uppsjávarskipin Jón Kjartansson SU-111, Guðrúnu Þorkelsdóttr SU-211 og Aðalstein Jónsson SU-11. Auk þess er starfrækir félagið umfangsmikla afurðastöð uppsjávarfisks á Eskifirði.

• Blogga um frétt