„Við förum út þegar vindur gengur niður“

Bergur VE kom til hafnar í Neskaupstað í nótt með 65 tonn. Jón Valgeirsson skipstjóri segir í færslu á vef Síldarvinnslunnar að veður hafi verið gott í túrnum þar til í blárestina.

„Aflinn er mest ýsa og þorskur og hann fékkst allur á Tangaflakinu. Það var komið leiðindaveður í gær og á að vera verra í dag samkvæmt spá. Við förum út þegar vindur gengur niður,” segir Jón.

Fram kemur í færslunni að systurskipið Vestmannaey VE kom til Neskaupstaðar á eftir Bergi og landar þar í dag sínum 45 tonnum.

Túrinn var stuttur og aflinn mest ýsa að sögn Birgis Þórs Sverrissonar skipstjóra. „Við vorum að veiðum á Glettinganesflaki, Gerpisflaki og á Skrúðsgrunni og það var rólegheitakropp allan tímann. Við höldum til veiða á ný í nótt þegar lægir.”

• Blogga um frétt