Leita að samstarfsaðila í Grímsey

Byggðastofnun auglýsir nú eftir samstarfsaðila um nýtingu viðbótaraflaheimilda í Grímsey. Um er að ræða allt að 300 þorskígildistonn á yfirstandandi fiskveiðiári sem og fiskveiðiárin 2025/2026 og 2026/2027.

Í tilkynningu á vef stofnunarinnar segir að endanlegt val á samstarfaðilum mun byggja á traustri rekstrarsögu forsvarsmanna umsækjanda og trúverðugum áformum um útgerð, vinnslu sjávarafurða eða aðra starfsemi. Ekki er þó vinnsluskylda tengd þessum byggðakvóta.

Síðastliðið haust hlaut krafa um að rekin yrði fiskvinnsla í Grímsey þó nokkra gagnrýni.

Frétt af mbl.is

Kvaðir Byggðastofnunar þröngsýnar

Byggðastofnun segir einnig verða horft til fjölda heilsársstarfa sem skapast með nýtingu kvótans og hvernig best verði tryggt að nýta þær veiðiheimildir sem fyrir eru í byggðarlaginu, auk þess sem tekið verður mið af jákvæðum áhrifum á önnur fyrirtæki og samfélagið.

Meginmarkmið verkefnisins er sagt vera að auka byggðafestu í þeim sjávarbyggðum sem „standa frammi fyrir alvarlegum og bráðum vanda vegna samdráttar í sjávarútvegi eða ætla megi að samdráttur í greininni myndi skapa slíkan vanda, eru háðastar sjávarútvegi og eiga minnsta möguleika á annarri atvinnuuppbyggingu [og] eru fámennar, fjarri stærri byggðakjörnum og utan fjölbreyttra vinnusóknarsvæða.“

• Blogga um frétt