Aflaverðmæti 19% minna

Aflaverðmæti við fyrstu sölu var 125,7 milljarðar króna á fyrstu níu mánuðum ársins 2024 samkvæmt bráðabirgðatölum Hagstofu Íslands. Er þetta 19% minna aflaverðmæti en á sama tímabili 2023 þegar verðmæti við fyrstu sölu nam 155 milljörðum króna.

Aflinn á tímabilinu var 741 þúsund tonn en var 1.120 þúsund tonn á fyrstu níu mánuðum síðasta árs. Samdráttinn má aðallega rekja til loðnubrests síðasta vetur og munar um 325 þúsund tonn af loðnu milli ára.

Þá var botnfiskaflinn á fyrstu níu mánuðum ársins 317 þúsund tonn sem er 6% meira en á sama tíma í fyrra og var verðmæti aflans við fyrstu sölu 94,5 milljarðar króna sem er sama verðmæti og á sama tímabili 2023.

Myndarleg aflaaukning var í ýsu sem jókst um 28% milli ára og var verðmæti hennar 14,7 milljarðar á tímabilinu. Þorskaflinn jókst um 3% og skilaði hann um 60 milljöðrum króna.

Helmingi minni uppsjávarafli

Landað var 403 þúsund tonnum af uppsjávarafla sem er 49% minna en á fyrstu níu mánuðum 2023 og var verðmæti hans við fyrstu sölu 21,5 milljarðar króna í ár sem er 55% minna en í fyrra.

Auk loðnubrests minnkaði síldaraflinn um 35% og makrílaflinn um 37%, Verulegur samdráttur varð einnig í verðmætum við fyrstu sölu síldar endaði í 5,2 milljörðum og makríls í 7,3 milljörðum. Í kolmunna sést hins vegar að aflinn eykst um 8% og verðmæti hans um 10%.

• Blogga um frétt