Framlengja gæsluvarðhaldið

Gæsluvarðhald yfir Paul Watson hefur verið framlengt til 18. desember af héraðsdómara í Nuuk á Grænlandi, en saksóknari hafði farið fram á að gæsluvarðhald yrði framlengt til 30. desember, að því er fram kemur í umfjöllun Sermitsiaq.

Málið má rekja til framsalsbeiðni japanskra yfirvalda vegna skemmdaverka sem unnin voru á japönsku hvalveiðiskipi árið 2010 sem Watson er sagður bera ábyrgð á, en hann hefur beitt ýmsum aðferðum svo sem eignaspjöllum og skemmdarverkum í áratuga langri baráttu sinni gegn hvalveiðum – þar með talið hér á landi.

Watson sem heldur upp á 74 ára af,æli sitt í dag hefur verið í haldi á Grænlandi frá 21. júlí síðastliðnum.

Það er undir Peter Hummelgaard, dómsmálaráðherra Danmerkur, komið að taka afstöðu til framsalsbeiðni Japans. Tilkynnti ráðuneytið á laugardag (30. nóvember) að ráðherrann myndi taka afstöðu til beiðninnar innan 14 daga.

Héraðsdómstóllinn í Nuuk vísaði til þess tímaramma sem ráðuneytið gaf út í rökstuðningi sínum fyrir því að framlengja gæsluvarðhaldinu í skemmri tíma en saksóknari fór fram á.

• Blogga um frétt