Til Neskaupstaðar eftir tvær vikur í slipp

Unnið hefur verið að ýmsu viðhaldi á Barða NK hjá Slippnum Akureyri, en þar var skipið í um tvær vikur í flotkví. Fór skipið á flot í gær og hélt þá til Neskaupstaðar þar sem verða tekin veiðarfæri áður en haldið er til kolmunnaveiða í færeysku lögsögunni.

Þetta kemur fram í færslu á vef Síldarvinnslunnar.

„Við gerum ráð fyrir að koma til Neskaupstaðar um klukkan fjögur í dag og við ættum að vera klárir til að láta úr höfn um miðnætti. Annars er dálítil óvissa í kortunum vegna veðurútlits. Hann spáir illa á fimmtudaginn og þá verður örugglega ekki veiðiveður,“ er haft eftir Theodóri Haraldssyni skipstjóra.

„Það er búið að vera ágætis nudd hjá kolmunnaskipunum í færeysku lögsögunni að undanförnu og menn eru bara bjartsýnir hvað veiðar varðar. Við erum auðvitað ólmir í að komast á sjóinn eftir þetta hlé,” segir hann.

• Blogga um frétt