Ísfélagið hf. hefur fjárfest í Robobatcher Box frá Marel sem mun auka pökkunargetu félagsins. Um er að ræða stórt skref í að auka sjálfvirkni og skilvirkni bolfiskvinnslu félagsins í Vestmannaeyjum, að því er segir í fréttatilkynningu.

„Nýja Robobatcher Box lausnin hjá Ísfélaginu er hönnuð til að raða bakflökum og hnökkum í þriggja eða fimm kílóa kassa með mikilli nákvæmni og hraða, í samræmi við meðalþyngd og stykkjafjölda. Lausnin er tveggja brauta pökkunarlína sem flokkar og raðar ferskum bitum í frauðkassa, ásamt færslukerfi, tékkvogum og límmiðaásetningu,“ segir í tilkynningunni.

Fjárfestingin í pökkunarlausninni var hluti af stækkunarverkefni með nýjum lausfrysti og hefur því tekist að auka afköst í pökkun ferskra afurða án þess að fjölga þurfi starfsfólki á línunni.

„Ef Marel heldur áfram að þróa lausnir sem bæta afkomu framleiðslulínunnar, þá höldum við áfram að velja Marel,“ er haft eftir Birni Brimar Hákonarsyni framleiðslustjóra Ísfélagsins. „Við erum spennt fyrir þeim möguleikum sem tæknivæðingin býður upp á.“

Robobatcher Box er sjálfvirk pökkunarlausn frá Marel. Ljósmynd/Aðsend

Viðskiptavinur í fleiri áratugi

Bent er á að Ísfélagið hafi verið meðal fyrstu viðskiptavina Marel við stofnun fyrirtækisins. Hraðfrystistöðin, sem síðar sameinaðist Ísfélaginu, pantaði vog frá Marel 1983 þegar félagið var aðeins lítið verkstæði í Garðabænum með tvo starfsmenn.

„Þessi fyrsta vog var mikilvæg tækniframför og var í notkun í áratugi. Reyndar eru það aðeins nokkrar vikur síðan Ísfélagið hætti að nota saltfiskvog með raðnúmerið 41, sannkallaðan safngrip. Vogin, sem hóf feril sinn við saltfiskvinnslu, endaði sem heilpakkavog við gæðaskoðun á pökkuðum uppsjávarafurðum. Samband Marel og Ísfélagsins hefur dafnað og styrkst í gegnum árin, þar sem Marel hefur útvegað lausnir sem hafa stuðlað að hagkvæmni og þróun í vinnslu Ísfélagsins,“ segir í tilkynningunni.

Er vakin athygli á því að nánast allur búnaður í bolfisksal frystihússins í Vestmannaeyjum er frá Marel. Má þar finna tæki á borð við FlexiTrim, FlexiCut, FlexiSort og tveggja brauta vippuflokkara. Allar vogir í húsinu eru frá Marel sem og nokkrir Smartline Flokkarar í uppsjávarlínunni. Auk þess hafa nýlega verið keyptar flæðivogir fyrir uppsjávarlínuna.

„Við erum afar stolt af því að styrkja enn frekar samband Marel og Ísfélagsins,“ segir Sindri Magnason, sölumaður hjá Marel. „Ísfélagið hefur treyst á okkur í mörg ár sem samstarfsaðila, og við erum spennt fyrir því að styðja við áframhaldandi vöxt þeirra.“

Tengdar fréttir

Ísfélag hf

Heimaey seld Norðmönnum

• Hafa fest kaup á skosku uppsjávarskipi
• Ísfélagið í stórræðum á Þórshöfn
• Bókfæra mikinn hagnað eftir skráningu
• Átakanlegt að missa fyrirtækið úr bænum

» Fleiri tengdar fréttir

• Blogga um frétt