Reynir á mannskapinn í mikilli veiði

Ísfisktogarinn Gullver NS lagði við bryggju á Seyðisfirði í dag með hundrað tonna afla, þar af voru um 60 þorskur og 40 tonn gullkarfi.

„Við fórum út frá Grundarfirði á sunnudagskvöld og veiðarnar hófust norður af Nætursölunni þar sem reynt var við gullkarfa. Það gekk virkilega vel og við fengum þarna um 40 tonn á einum sólarhring eða svo,“ segir Hjálmar Ólafur Bjarnason skipstjóri í færslu á vef Síldarvinnslunnar.

Hann segir næst hafi verið haldið á Kögurgrunn þar sem ætlunin var að ná þorski.

„Það var lítið hjá okkur í fyrsta holi en síðan brast á hörkuveiði. Þegar svona veiðist reynir mikið á þann mannskap sem gengur frá aflanum og það skiptir miklu máli að áhöfnin sé samhent. Álagið er gífurlegt og allir þurfa að hjálpast að og leggja sitt af mörkum. Við fengum þarna um 60 tonn af þorski á 18 tímum. Það verður að segjast að í þessari veiðiferð fékkst hörkuafli en það var einungis tvo sólarhringa verið að veiðum, restin af tímanum fór í siglingar,“ segir hann.

Gullver heldur til veiða á ný á sunnudag.

• Blogga um frétt