Ufsatorfa í höfninni vekur athygli

Mikil ufsatorfa hefur gert sig heimakomna í Hafnarfjarðarhöfn. Fræðingar Hafrannsóknarstofnunar segja ufsana hafa klakist úr eggjum í vor og eru þeir því um hálfs árs gamlir.

„Þessi fjöldi ufsa er óvenjumikill en ufsaseiði á fyrsta ári eru þó mjög algeng í höfnum allt í kringum landið. Uppeldissvæði ufsa eru að jafnaði grynnra en t.d. þorsks og ýsu,“ segir í facebookfærslu Hafrannsóknarstofnunar.

Þar kemur einnig fram að athygli hafi vakið að torfan sé innst í höfninni en óljóst sé hvers vegna svo er.

„Ýmislegt kemur til greina. Þarna eru t.d. sterkir ljóskastarar sem mögulega laða ufsann að, mögulega er þarna affall frá frá bænum sem skapar aðstæður sem ufsinn sækir í og kannski er hann að forðast þá sem vilja éta hann t.d. skarfa, endur, seli og hvali,“ segir í færslunni.

• Blogga um frétt