Landeldisfélagið AquaBounty hættir rekstri

Stjórn bandaríska landeldisfyrirtækisins AquaBounty Technologies Inc. hefur ákveðið að loka síðustu starfsstöð sinni, seiðastöð fyrirtækisins í Bay Fortune í Kanada. Áður hafði fyrirtækið rekið laxeldisstöðvar í Indiana og Ohio í Bandaríkjunum.

„Við höfum lagt áherslu á að viðhalda starfsemi í Bay Fortune stöðunni en höfum ekki nægjanlegt lausafé til að halda því áfram. Við höfum unnið í rúmt ár við að afla fjár, meðal annars við sölu á eldisstöðvum okkar og búnaði. Því miður hafa þessar aðgerðir ekki skilað nægu fé til að viðhalda rekstraraðstöðu okkar. Sjáum við því ekki annað í stöðunni en að leggja niður reksturinn sem eftir er og fækka starfsfólki,“ segir David Frank fjármálastjóri AquaBounty í tilkynningu á vef félagsins.

Fram kemur að Dave Melbourne, framkvæmdastjóri félagsins, hafi sjálfviljugur sagt starfi sínu lausu auk þess sem Alejandro Rojas rekstrarstjóri og Melissa Daley starfsmannastjóri hafa hvatt fyrirtækið.

„Á næstu mánuðum munum við halda áfram að vinna með bankanum okkar að því að meta valkosti fyrir verkefnið okkar í Ohio og við munum halda áfram að markaðssetja og selja tiltækar eignir til að búa til reiðufé. Við munum halda öllum hagsmunaaðilum upplýstum um framvindu okkar,“ segir Frank.

Fjölmörg rekstrarvandamál

Fyrirtækið, sem starfað hefur frá 1989, bætist í hóp fleiri fyrirtækja sem reynt hafa að ná samkeppnisforskoti með því að framleiða lax nálægt mörkuðum. Hugmyndir slíkra verkefna hafa byggt á að eyða út kostnaðaraukningunni sem verður til við eldi langt frá náttúrulegum heimkynnum laxins með m.a. lægri flutningskostnaði og lengri líftíma afurða í vöruhillum.

Eitt þeirra áskorana sem slík starfsemi hefur glímt við er aðgengi að nægilegu vatni. Hefur því verið þróað endurvinnslukerfi sem hreinsar frárennsli og dælir vatninu í eldisstöðinna á ný. Slík kerfi nota meðal annars líftækni til að hreinsa vatnið og eru því mjög viðkvæm, geta smávægileg frávik leitt til mikils laxadauða.

Þessi vandamál fylgdu einnig eldi AquaBounty sem hefur þurft að takast á við sjúkdóma og mikinn laxadauða. Fram kemur í tilkynningu félagsins að fjölmörg vandamál hafi verið við reksturinn, meðal annars hafi ekki fengist nægt eldsneyti, rafmagn, vatn, súrefni og frjóvguð egg.

Þá er einnig bent á íþyngjandi regluverk matvælastofnunar Bandaríkjanna og opinberra aðila á mörkuðum fyrir afurðir félagsins.

• Blogga um frétt