Á fundi hagsmunasamtaka sjómanna og útvegsmanna í dag var ákveðið að hækka viðmiðunarverð þorsks um 8% og ýsu um 11,1% en viðmiðunarverð ufsa og karfa helst óbreytt, að því er fram kemur í tilkynningu á vef Verðlagsstofu skiptaverðs.

Viðmiðunarverð, eða svokallað verðlagstofuverð, er lágmarksverð við innri sölu útgerða sem reka eigin vinnslu og er til grundvallar launa sjómanna. Geta sjómenn því átt von á myndarlegri launaukningu nú í upphafi vetrarvertíðarinnar, að því gefnu að aflinn verði myndarlegur.

Viðmiðunarverð slægðs fimm kílóa þorsks er nú 455,2 krónur og 372,15 krónur óslægt. Viðmiðunarverðið á slægðum þorski er nú 16% hærra en í janúar 2024 og hefur líklega aldrei verið hærra.

Verð slægðrar tveggja kílóa ýsu í janúar verður 224,06 krónur en 211,89 krónur óslægt. Viðmiðunarverð slægðrar og óslægðrar ýsu breyttist síðast nóvember 2023 þegar verð var lækkað um 9%. Viðmiðunarverð á slægðri ýsu náði hámarki sínu í apríl til maí 2023 þegar það nam 280,97 krónum.

Þá hefur verð á ufsa haldist óbreytt í 210,3 krónum frá mars á síðasta ári. Hæst var það á tímabilinu júní til nóvember 2023 þegar það var 233 krónur.

Viðmiðunarverð karfa hefur er nú 180,68 krónur og hefur verið óbreytt frá og með júní síðastliðnum, en á tímabilinu desember 2023 til maí 2024 var það 188,21 króna sem er jafnframt hæsta lágmarksverð sem sést hefur.

Tengdar fréttir

Kjaramál sjómanna

„Öll gögn þurfa þá að liggja á borðinu“

• „Hvað með sjómenn?“
• Viðmiðunarverð þorsks aldrei hærra
• Djúpkarfakvótinn tryggði laun sjómanna
• „Þetta er hrein og klár misnotkun“

» Fleiri tengdar fréttir

• Blogga um frétt