Það mikilvægasta í umræðunni um íslenskan sjávarútveg er alþjóðleg samkeppnishæfni hans, segir Þorsteinn Már Baldvinsson forstjóri Samherja í færslu á vef útgerðarinnar.

„Ég er á margan hátt nokkuð bjartsýnn á árið. Ný ríkisstjórn segir brýnt að auka verðmætasköpun og stöðugleika í efnahagslífinu, sem ég tek heilshugar undir. Lykilatriði í þessum efnum er að útflutningsgreinar okkar séu samkeppnishæfar á alþjóðlegum mörkuðum. Ég tel að sjávarútvegur geti lagt töluvert af mörkum til þessa mikilvæga markmiðs og vonandi ber okkur gæfu til að atvinnugreinin geti átt gott og árangursríkt samstarf við stjórnvöld um aukna verðmætasköpun í útgerð, fiskvinnslu og fiskeldi,“ segir hann.

Útskýrir Þorsteinn að Samherja hafi tekist að hafa vinnsluna starfandi alla virka daga síðasta árs, nema tvo daga í nóvember sökum veðurs.

Markaðurinn kallar eftir því að það sé stöðugt framboð afurða alla daga ársins að sögn hans. en um nokkurt skeið hefur verið rætt um mikilvægt samkeppnisforskot sem myndast við að geta tryggt viðskiptavinum stöðugleika í afhendingu afurða.

Frétt af mbl.is

„Við erum að rembast við að vera 365“

„Þessa dagana nýtum við til dæmis allt það pláss sem gefst í flugi frá landinu til að koma afurðum okkar til kaupenda. Ferskur íslenskur fiskur var kominn á diska neytenda 4. janúar.“

Kemur fram í færslunni að ísfisktogarar Samherja héldu til veiða skömmu eftir miðnætti fimmtudaginn 2. janúar 2025 og vinnsla í landvinnslum félagsins hófst um morguninn. Uppsjávarskipið Vilhelm Þorsteinsson og frystitogarinn Snæfell fóru til veiða 3. janúar.

Keppa við láglaunasvæði

„Víða um land eru kraftmikil sjávarútvegsfyrirtæki með fjölda fólks í vel launuðum heilsársstörfum. Undir er ekki aðeins lífsafkoma sjómanna og starfsfólks í landi heldur einnig rekstur þeirra fyrirtækja sem þjónusta sjávarútveginn,“ segir Þorsteinn.

Bendir hann á að stærstu hvítfiskvinnslur séu nú að finna í Póllandi og Kína þar sem launakostnaður er aðeins brot af launakostnaði fyrirtækja á Íslandi. „Íslenskur sjávarútvegur er að velta innan við 400 milljörðum króna á meðan sjávarútvegurinn í Noregi veltir um 2.300 milljörðum króna. Við erum með öðrum orðum ekki stór í þessum samanburði.“

„Verðmætasköpunin byggist meðal annars á flókinni og tæknilegri vinnslu, bæði til sjós og lands. Tækniframfarir og fjárfestingar eru forsendur samkeppnishæfni og fyrirtækin þurfa að tryggja viðskiptavinum sínum gæðaafurðir alla daga ársins. Þessar staðreyndir skulum við hafa í huga í allri umræðunni, sem á það til að fara út og suður,“ segir Þorsteinn í færslunni.

Tengdar fréttir

Fiskveiðistjórnunin

Dregur í efa sjálfbærni sjávarútvegsins

• Binda enda á 63 ára útgerðarsögu
• Hvert kíló skilar Íslendingum mun meira
• Lítil samþjöppun aflaheimilda
• Vill innkalla allar aflaheimildir

» Fleiri tengdar fréttir

Samherji

Skipin í höfn og komin í sparifötin

• Hæstiréttur hafnar kröfu Þorsteins Más
• Samherji hafði betur gegn Odee
• Hafa fjarfest meira en nemur hagnaði
• Fyrrverandi starfsfólki „sé haldið í spennitreyju“

» Fleiri tengdar fréttir

• Blogga um frétt