Séraðgerðasveit LHG á leiðinni norður

Séraðgerðasveit Landhelgisgæslunnar er nú á leið norður og verður fyrsta verk hennar að kanna hvort hluturinn sem Björg EA kom til hafnar með í morgun sé tundurdufl. Sé það raunin mun næsta skref vera að eyða því.

Þetta segir Ásgeir Erlendsson upplýsingafulltrúi Landhelgisgæslunnar í samtali við 200 mílur.

Greint var frá því á vef Samherja í dag að áhöfnin á skipinu hefði fyrst talið að um gamla tunnu væri að ræða en síðan hafi vaknað grunur um að þetta væri tundurdufl/djúpsprengja. Var fiskvinnsla Útgerðarfélags Akureyringa rýmd vegna þessa.

Tundurdufl er sprengja sem komið er fyrir í hafi og er ætlað að granda kafbátum eða skipum. Miklum fjölda slíkra sprengja var komið fyrir í hafinu umhverfis Ísland og víðar um Evrópu í seinni heimsstyrjöldinni og eru þessar sprengjur enn sjófarendum til ama þó liðnir séu tæpir átta áratugir frá stríðslokum.

Frétt af mbl.is

Rýmdu fiskvinnslu vegna tundurdufls

Yfirleitt eytt úti á hafi

„Það var haft samband við stjórnstöð Landhelgisgæslunnar vegna íslensks fiskiskips sem kom til Akureyrar fyrr í dag hafði fengið það sem séraðgerðasveitin telur að sé djúpsprengja (tundurdufl). Séraðgerðasveitin er á leiðinni norður og reynist þetta vera djúpsprengja eins og talið er er það næsta verk séraðgerðasveitarinnar að eyða henni,“ segir Ásgeir.

Hann útskýrir að oftast þegar svona sprengjur fari í veiðarfæri sé farið með þær út á sjó þar sem þeim er eytt.

„Þá er reynt að finna heppilegan stað með nægu dýpi og sprengjan þá sprengd.“

Minnir Ásgeir á að enn eigi eftir að skoða hlutinn til að ganga úr skugga um hvers konar hlut sé að ræða. Þegar greiningu er lokið mun séraðgerðasveitin í samráði við lögreglu meta næstu skref. Málið er á forræði lögreglunnar þar sem hluturinn er kominn á land.

• Blogga um frétt