Hagnaður sjávarútvegs minnkað milli ára

Hagnaður fyrirtækja í fiskveiðum og vinnslu fyrir afskriftir, fjármagnskostnað og tekjuskatt (EBITDA) sem hlutfall af heildartekjum sjávarútvegs minnkaði á milli áranna 2022 og 2023, að því er fram kemur í hagtíðindum Hagstofu Íslands.

Þar segir að „frá árinu 2022 lækkaði hlutfallið (án milliviðskipta) úr 37% í 36,5%, hækkaði í fiskveiðum úr 24,6% árið 2022 í 24,9% af tekjum árið 2023 og lækkaði í fiskvinnslu úr 21,1% í 18,3%.“

Hreinn hagnaður (EBT) fyrirtækjanna samkvæmt árgreiðsluaðferð er sagður hafa dregist saman milli ára og hafi verið 24% árið 2023 en var 26,3% árið á undan.

„Í fjárhæðum nam hagnaðurinn rúmum 72 milljörðum króna eftir að gjaldfærð hefur verið árgreiðsla að fjárhæð rúmum 38 milljörðum króna. Sé miðað við hefðbundna uppgjörsaðferð nam hagnaðurinn rúmum 70 milljörðum króna eða 23,2% af tekjum árið 2023 borið saman við 27,3% árið áður.“

Fram kemur einnig að heildareignir í sjávarútvegi voru í árslok 2023 tæpir 1.059 milljarðar króna, heildarskuldir rúmir 554 milljarðar króna og eigið fé rúmir 505 milljarðar króna samkvæmt efnahagsreikningi.

• Blogga um frétt