Kíló af kolmunna fyrir 64 grömm þorsk

Ríkið fékk rétt rúmlega þúsund tonna veiðiheimildir í þorski í skiptum fyrir 16.182 tonna kolmunnakvóta á skiptamarkaði í janúar. Fengust þannig 0,064 kíló af þorski í skiptum fyrir hvert kíló af kolmunna.

Þetta má lesa úr færslu á vef Fiskistofu. Þar segir að 25 tilboð hafi borist í kolmunnakvótann en sjö tilboðum hafi verið tekið að fullu eða að hluta.

Aðeins tilboð tveggja útgerða voru samþykkt og fær togarinn Helga María RE, sem Brim hf. gerir út, 6.800 tonna kolmunnakvóta í skiptum fyrir 439 tonn í þorski. Börkur NK, uppsjávarskip Síldarvinnslunnar, fær hins vegar 9.382 tonna heimildir í kolmunna í skiptum fyrir 597 tonn í þorski.

Af tilboðunum var hagstæðustu skiptin í tilfelli Barkar þar sem fengust 382 tonn í kolmunna fyrir 19,3 tonn í þorski, sem í þeim skiptum varð skiptastuðullinn 0,05.

• Blogga um frétt