Veiktist um borð í íslensku skipi

Þyrlusveit Landhelgisgæslunnar var kölluð út í gærmorgun vegna veikinda um borð í íslensku skipi sem statt var um 60 sjómílur norður af Hornströndum.

Að sögn Landhelgisgæslunnar tók áhöfnin á TF-GRO á loft frá Reykjavíkurflugvelli á níunda tímanum. Tekið er fram að þegar farið sé í útköll sem þessi þá sé önnur þyrluáhöfn sett í viðbragðsstöðu í Reykjavík til að gæta fyllsta öryggis.

Fluttur til Reykjavíkur

Laust fyrir klukkan tíu í gær var þyrla Gæslunnar komin að hlið skipsins. Áhöfn hennar byrjaði á að slaka tengilínu niður til áhafnar skipsins og sigmaður seig því næst um borð svo unnt væri að undirbúa sjúklinginn undir að vera hífður um borð í þyrluna.

Hífingin gekk vel og skipverjinn var fluttur á sjúkrahús í Reykjavík, að því er segir í tilkynningu frá Gæslunni. 

• Blogga um frétt