Gefin verði út lágmarksvóti í loðnu
Setja bókamerki
Í viðtali í nýjasta blaði 200 mílna sagði Páll Snorrason framkvæmdastjóri Eskju að það þurfi nýja nýtingarstefnu í loðnunni og lagði til að tryggð verði ávallt lágmarksveiði til manneldis til að tryggja stöðuna á mörkuðum.
Útflutningsverðmæti loðnuafurða árin 2021 til 2023 námu rúmlega 108 milljörðum króna, þar af mest árið 2022 þegar útflutningsverðmætin námu 51,3 milljörðum króna. Loðnuvertíð hefur víðtæk áhrif á hagkerfið allt, bæði í gegnum skattspor reksturs sjávarútvegsfyrirtækjanna og vegna tekna þeirra sem hafa beina og óbeina atvinnu af henni.
Mátti til að mynda greina 9% samdrátt í atvinnutekjum í sjávarútvegi á fyrstu níu mánuðum ársins 2024 í samanburði við fyrstu níu mánuði 2023. Áhrifin voru mest áberandi á þeim svæðum þar sem loðnu er landað og hún unnin. Varð 21% samdráttur á Austurlandi og 19% á Suðurlandi. Minnkuðu atvinnutekjur af sjávarútvegi um 25% í Fjarðabyggð, um 28% í Vestmannaeyjum og 17% á Höfn í Hornafirði.
Ekki ánægð með stöðuna
„Já við erum nú ekki ánægð með stöðuna en viljum alls ekki gefa það upp á bátinn að það verði vertíð,“ sagði Páll í viðtalinu inntur álits á stöðunni eins og hún var fyrir síðustu helgi.
Verði niðurstaðan að engar loðnuveiðar verði heimilaðar þetta árið hefur það töluverð áhrif á rekstur Eskju að sögn Páls sem þó tekur fram að útgerðin hafi burði til að laga reksturinn að slíkri stöðu. Hann telur hins vegar að þörf sé á nýrri nálgun hvað loðnuna varðar.
„Ég er þeirrar skoðunar að það ætti að hugsa þetta upp á nýtt og leyfa alltaf einhverja lágmarksveiði til að vernda mikilvæga manneldismarkaði sem við höfum haft fyrir að byggja upp. Með því móti myndum við einnig fá mikilvægar upplýsingar um loðnuna frá veiðiskipum,“ útskýrði hann.
Ítarlega umfjöllun um loðnumálin má lesa í nýjasta blaði 200 mílna.
Sveitarfélög þurfa að skera niður
Mæli óhikað með þessari meðferð
Óskýr ákvæði um kílómetragjald í landbúnaði
Segir sjúkraflug á Húsavík í uppnámi
Betri yfirsýn með hverjum klukkutíma sem líður
Kona gekk í skrokk á konu
Fjölskyldur vilja flytja og börn skipta um skóla