Bandaríkin helstu kaupendur íslensks lax
Setja bókamerki
Seldar voru til Bandaríkjanna eldisafurðir fyrir 2,3 milljarða króna í janúar síðastliðnum og hefur útflutningsverðmæti ílenskra eldisafurða til Bandaríkjanna aldrei verið meira í einum mánuði. Bandaríkin voru jafnframt helsti markaður íslenskra eldisafurða í janúarmánuði.
Þetta kemur fram í greiningu Radarsins, en þar er fjallað um nýjustu útflutningstölur Hagstofu Íslands.
Þar segir að 95% þeirra eldisafurða sem seldar voru til Bandaríkjanna hafi verið lax.
Eins og nefnt hefur verið voru Bandaríkin helsti markaður fyrir íslenskar eldisafurðir í janúar, en næst mest af eldisafurðum var selt til Hollands eða fyrir um 1,6 milljarða króna. Á eftir fylgir Danmörk með 900 milljónir króna.
„Athygli vekur að útflutningur til Þýskalands vex stórum og slagar hann nú í hálfan milljarð. Annars staðar dregst hann nokkuð saman og nefna má Danmörku, Frakkland og Pólland en Holland stendur nokkurn veginn í stað. Þetta má lesa úr tölum Hagstofunnar sem nýlega voru birtar,“ segir í greiningu Radarsins.
Óvissa um áhrif tolla
Eins og flestum er kunnugt hefur Donald Trump forseti Bandaríkjanna lýst yfir tollum á vörur frá Kanada, Mexíkó og Kína, en í Kanada er framleitt töluvert af eldislaxi. Hafa þar einnig verið viðraðar hugmyndir um innflutningstolla á vörur frá ríkjum Evrópusambandsins.
Philip Scrase, yfirmaður greiningadeildar fiskeldis hjá Kontali, hefur sagt tolla á kanadískan eldislax leiða af sér samkeppnisforskot annarra framleiðenda eldislax á bandarískum markaði til skamms tíma, en harðnandi samkeppnisskilyrði á öðrum mörkuðum.
„Sem stendur er ómögulegt að geta sér til um hvort áformin muni hafa áhrif á útflutning frá Íslandi. Ef litið er nokkur ár aftur í tímann, til ársins 2019, kemur í ljós að hlutfall eldisafurða af heildarútflutningsverðmæti sjávarafurða í janúar og febrúar hefur aukist umtalsvert, úr 10% í 26%. Bara frá árinu 2022 hefur það rúmlega tvöfaldast,“ segir í greiningu Radarsins.
Á fyrstu tveimur mánuðum ársins nam útflutningsverðmæti eldisafurða 14,6 milljörðum króna sem er rúmlega 11% aukning frá sömu mánuðum á síðasta ári og ríflega 55% aukning frá janúar og febrúar 2023.
Allir þrettán lausir úr haldi
Eldur á geymslusvæði í Hafnarfirði
Leit heldur áfram við Kirkjusand
Tugþúsundir með ógreindan kæfisvefn á Íslandi
Leggur til breytingar á lögum um ökuskírteini
Guðmundur Ingi sagður taka við af Ásthildi Lóu
Ásthildur Lóa ekki viðstödd lyklaskiptin