Mariam til liðs við Wisefish

Mariam Laperashvili hefur verið ráðin sem markaðsstjóri Wisefish, að því er fram kemur í fréttatilkynningu frá fyrirtækinu. Fyrirtækið er hugbúnaðarhús í viðskiptalausnum fyrir aðfangakeðju sjávarútvegs- og eldisfyrirtækja á heimsvísu.

Fram kemur að Mariam „mun gegna lykilhlutverki í að auka alþjóðlegan vöxt félagsins og styrkja vörumerki Wisefish“.

Mariam er sögð búa yfir víðtækri reynslu í fjölmiðlum, sölu, stafrænni þróun og markaðsmálum. Hún kemur til Wisefish frá fjártæknifyrirtækinu Standby, þar sem hún starfaði sem framkvæmdastjóri markaðsmála með sérstaka áherslu á Bandaríkjamarkað. Áður starfaði hún sem forstöðumaður markaðs- og samskiptamála fjölmiðla Sýnar og hefur yfir árin unnið hjá íslenskum fyrirtækjum eins og Sagafilm, Reon og Tulipop og bandarískum félögum WorkAmerica og National Geographic.

Mariam er viðskiptafræðingur að mennt, lauk B.Sc. námi frá Háskóla Íslands og stundaði einnig nám við George Washington University þar sem hún sérhæfði sig í markaðsfræðum.

„Wisefish býður upp á lausn sem leysir flóknar áskoranir í sjávarútvegi og veitir fyrirtækjum þau verkfæri sem þau þurfa til að halda forskoti á markaðnum,“ er haft eftir Mariam í tilkynningunni. „Ég hlakka til að leggja mitt af mörkum og taka þátt í spennandi vegferð sem framundan er með frábæru teymi hjá Wisefish “

Mariam hefur nú þegar hafið störf.

• Blogga um frétt