Telur ríkisstjórnina ekki skilja „verðmætasköpun“
Setja bókamerki
„Ég verð nú að viðurkenna það að það eru engir jákvæðir punktar þarna,“ segir Sigurður Ingi Jóhannsson, formaður Framsóknarflokksins.
Hann málar upp dökka mynd af afleiðingum breytinga á veiðigjöldum fari svo að þær verði samþykktar.
Hanna Katrín Friðriksson atvinnuvegaráðherra og Daði Már Kristófersson fjármálaráðherra kynntu breytingarnar í dag en í þeim felst breyting á skráðu aflaverðmæti fyrir bæði botnfisk og uppsjávarfisk.
Breyting sem átti að gerast á tíu árum
Í samtali við mbl.is segist Sigurður hafa haft áhyggjur af því að ríkisstjórnin skilji ekki orðið „verðmætasköpun“ og að það hafi kristallast í dag.
Nefnir hann einnig loforð fyrir kosningar um að skoða ætti tvöföldun veiðigjalda á tíu árum, en nú sé það að raungerast á nokkrum vikum.
Minni fyrirtækin munu gefast upp
Þá séu afleiðingarnar fyrirséðar:
„Fjárfestingum í fiskvinnslu á Íslandi er lokið, fiskvinnsla mun flytjast úr landi, óunninn fiskur mun flytjast úr landi, verðmætasköpun flyst úr landi, útflutningstekjurnar lækka, krónan gefur eftir, verðbólgan heldur áfram, atvinnuleysi eykst og landsbyggðin blæðir,“ segir formaðurinn og nefnir að ofan á tvöföldun veiðigjalda standi einnig til að hækka kolefnisgjald um nokkra milljarða á sömu atvinnugrein í þokkabót.
Segir Sigurður að stærri fyrirtækin muni hugsanlega geta staðið undir breytingunum en að minni fyrirtækin muni gefast upp og flytja út.
Vonar að ríkisstjórnin sjái að sér
„Ég vænti þess að þessar tillögur fari í almenna umræðu og ég vona að þau sjái hreinlega að sér.“
„Þessi mynd sem ég var að teikna upp, hún er upphafið að þessu og hún gerist auðvitað ekki í einni hendingu en þetta gerist á næstu árum.“
Indversk stjórnvöld æf eftir árás
Hættuleg gatnamót í borginni lagfærð
„Bitnar kannski harðast á fastráðnu starfsfólki“
Landris svipað og fyrir síðasta eldgos
Bankarnir þrír kerfislega mikilvægir
„Mikil vinna í gangi varðandi skýrslutökur og gagnaöflun“
Segja frumvarpið stuðla að pólitískri mismunun