Stofnvísitala þorsks er aðeins lægri í ár en í fyrra samkvæmt niðurstöðum stofnmælingar botnfiska á Íslandsmiðum sem fram fór 27. febrúar til 23. mars. Fjöldavísitala þorsks 25 til 45 sentímetra var undir meðaltali en líkt og undanfarin ár var vísitala þorsks yfir 70 sentímetra yfir meðaltali.

Þetta kemur fram í færslu á vef Hafrannsóknastofnunar þar sem greint er frá því að út sé komin skýrsla um framkvæmd og niðurstöður mælingarinnar og þær bornar saman við fyrri ár en verkefnið hefur verið framkvæmt með sambærilegum hætti ár hvert frá 1985.

Fram kemur að stofnvísitala þorsks hækkaði nær samfellt árin 2007-2017, fyrst og fremst vegna aukins magns af stórum þorski. Eftir hámarkið 2017 hefur vísitalan lækkað.

Magafylli þorsks var nálægt meðaltali og loðna var rúmlega helmingur af fæðu þorsks af öllum stærðarflokkum. Loðna fannst helst í fæðu þorsks út af Vestfjörðum og Húnaflóa.

Einnig loðna í ýsunni

Þá lækkar stofnvísitala ýsu milli ára en hún hefur verið mjög há undnafarin ár eftir mikla hækkun frá árinu 2016, lægst var hún árin 2010 til 2016.

Meira var af loðnu í mögum millistórrar ýsu en minna í mögum stærstu ýsunnar samanborið við fyrri ár. Loðna fannst helst í mögum út af Vestfjörðum.

Stofnvísitala ufsa hækkar milli ára, en litlar breytingar voru á vísitölum steinbíts, skarkola og gullkarfa. „Þó var vísitala 10-15 cm gullkarfa yfir meðallagi. Vísitölur keilu og löngu voru þær hæstu frá upphafi mælinga og einnig hefur vísitala skötusels hækkað á síðustu árum,“ segir í færslunni.

Tengdar fréttir

Hafrannsóknastofnun

Þórunn Þórðardóttir bilaði

• Fyrsta marsralli Þórunnar lokið
• Frumkvöðull með smitandi áhuga
• Spara hundruð tonna af olíu árlega
• Söguleg tímamót íslenskra hafrannsókna

» Fleiri tengdar fréttir

• Blogga um frétt