Búið að nýta 71% þorskkvótans

Tæplega 49 þúsund tonna þorskkvóti er enn ónýttur af þeim 172.266 tonnum sem heimildir eru fyrir á yfirstandandi fiskveiðiári sem lýkur 31. ágúst. Íslenski fiskiskipaflotinn er því búinn að nýta rúmlega 71% af þorskkvótanum.

Þetta má lesa úr gagnagrunn Fiskistofu, en vert er að geta þess að það getur tekið nokkra daga fyrir landanir að verða skráðar í grunninn.

Fjöldi báta og skipa eru þegar búin að klára allan þann þorskkvóta sem þau fengu úthlutað og má því búast við því að einhverjir verða bundnir við bryggju fram að fiskveiðiáramótum.

Staðan í ýsunni er svipuð, en þar er búið að landa 71% af 63 þúsund tonna ýsukvóta. Eftir standa ónýtt rúm 18 þúsund tonn.

ÞAð vantar töluvert upp á að ná öllum þeim ufsa sem heimilt er að veiða. Ljósmynd/Guðmundur Alfreðsson

Íslensku fiskiskipin hafa landað um 23,7 þúsund tonnum af gullkarfa frá upphafi fiskveiðiársins 2024/2025 sem hófst 1. september. Hefur þannig verið landað um 56% af 42 þúsund tonna karfakvóta.

Eins og undanfarin ár hefur gengið illa að veiða upp í ufsakvótann og á eftir að veiða rúm 49 þúsund tonn af rúmlega 67 þúsund tonna ufsakvóta.

Þá hefur tekist að landa um helming þess steinbít, grálúðu og gulllax sem heimildir eru fyrir á fiskveiðiárinu.

• Blogga um frétt