Óðinn til Ólafsvíkur á sjómannadaginnn

Safnskipinu Óðni verður siglt frá Reykjavík til Ólafsvíkur í tilefni af sjómannadeginum í ár. Farið verður úr Reykjavík að kvöldi fimmtudagsins 29. maí og haldið vestur, þangað sem er 7-8 tíma sigling.

Í Ólafsvík verður Óðinn og skipverjar með minningarathöfn á föstudeginum. Hægt verður að komast um borð og kynna sér þetta góða, víðfræga varðskip, sem var í þjónustu í áratugi og þar á meðal í þremur þorskastríðum. Óðni verður svo aftur siglt til Reykjavíkur; fyrir Nesið og þvert yfir Faxaflóann aðfaranótt laugardags þar sem skipið kemur árla dags.

Þetta er í fjórða sinn sem Óðinn fer í siglingu sem þessa í tengslum við sjómannadaginn. Fyrri ferðir hafa verið frá Reykjavík til Grindavíkur, Vestmannaeyja og út að Garðskaga. Í áhöfn eru 14-16 manns, það er að mestu mannskapur frá þeim tíma er Gæslan gerði skipið út. Skipstjóri verður Vilbergur Magni Óskarsson. sbs@mbl.is