Botnfiskafli jókst um 23%

Íslenski fiskiskipaflotinn landaði 65.882 tonnum í mars síðastliðnum og er það um 9% meiri afli en í sama mánuði í fyrra. Munar þar mestu um botnfiskafla sem jókst um 23% í 48.620 tonn.

Þetta má lesa úr tölum Hagstofu Íslands.

Meðal botnfiskafla munar mestu um þorsk, ýsu og „annan botnfiskafla“ en magn jókst um meira en tvö þúsund tonn í hverjum þessum tegundaflokkum. Myndarleg aukning varð einnig í karfa og ufsa, en illa hefur gengi að ná ufsanum í vetur.

Frétt af mbl.is

Hrakleg ufsaveiði í vetur

Um 1.800 tonn af flatfiskafla var landað í mars á þessu ári og er það um 18% minna en í sama mánuði í fyrra. Hlutfallslega varð jafn mikill samdráttur í uppsjávarafla en landað var ríflega 14 þúsund tonnum af kolmunna í mars.

Leiðindaveður var í febrúar sem hafði veruleg áhrif á sjósókn margra og því mátti að vissu leiti búast við auknum afla í mars.

Frétt af mbl.is

„Fegnir að vera lausir við bræluskítinn“

Innan við milljón tonn

Ef litið er til 12 mánaða tímabils frá apríl 2024 til mars 2025 var landað 992 þúsund tonnum sem er 8% minni afli en sama 12 mánaða tímabil á undan. Skýrist samdrátturinn af um hundrað þúsund tonna samdrætti í uppsjávarafla og munar mestu um makríl og síld.

Botnfiskafli jókst á sama tíma um 6% í 429 þúsund tonn. Þar af var þorskur 223 þúsund tonn, ýsa 87 þúsund tonn, karfi 43 þúsund tonn og ufsi 37 þúsund tonn.

• Blogga um frétt