Hulda og Tómas á stefnumóti í Grindavík

Togararnir Hulda Björnsdóttir GK-11 og Tómas Þorvaldsson GK-12 komu til löndunar í Grindavíkurhöfn í gærmorgun. Tómas með um 400 tonn af frystum afurðum og Hulda með um 120 tonn af ferskum fiski.

Í færslu á vef Grindavíkurbæjar er vakin athygli á því að skipin tvö bera nöfn hjónanna Huldu og Tómasar, sem voru meðal stofnenda útgerðarfélagsins Þorbjarnar hf. á sínum tíma. Eru hjónin sögð hafa átt táknrænt stefnumót í heimahöfn sinni í Grindavík.

Afkomendur þessara hjóna eiga skipin tvö í dag, en í gegnum sitt hvort félagið. Hulda Björnsdóttir er gerð út af félaginu Ganti ehf. en Tómas Þorvaldsson af Útgerðarfélagi Grindavíkur.

Útgerð Þorbjarnar var skipt upp í þrjú fyrirtæki á síðasta ári og er hið þriðja Bliki Seafood ehf. sem gerir út togarann Hrafn Sveinbjarnarson GK-255. Hann er væntanlegur til Grindavíkur á mánudag.

Frétt af mbl.is

Hver hópur fær togara og Sturlu lagt

• Blogga um frétt