Taprekstur hjá Vinnslustöðinni – Nýsmíðum slegið á frest

Vinnslustöðin skilaði 500 milljóna króna tapi á síðasta ári, samkvæmt því sem kynnt var á aðalfundi félagsins sem haldinn var í gær. Loðnubrestur var helsti áhrifaþátturinn, og var þetta aðeins í annað sinn á 25 árum sem félagið er rekið með tapi. Velta félagsins var um 26 milljarðar króna og fjárfest var fyrir tæplega 2,9 milljarða í botnfiskvinnslu.

Áformin um smíði nýrra togbáta hafa verið sett á ís vegna fyrirhugaðrar tvöföldunar veiðigjalda. Guðmundur Örn Gunnarsson, stjórnarformaður, sagði slíka gjaldahækkun grafa undan getu félagsins til að fjárfesta í vistvænum skipum. Ekki verður greiddur arður til hluthafa í ár.

Loðnubrestur var stærsti áhrifavaldur taprekstursins, að því sem fram kom. Sama staða og áður hefur raungerst nú á nýju ári og lýsti Guðmundur Örn Gunnarsson, stjórnarformaður, yfir verulegum áhyggjum af litlum skilningi á hegðun loðnunnar. „Það er mikið áhyggjuefni, ekki aðeins fyrir okkur, heldur allt samfélagið, hve lítið er vitað um loðnu,“ sagði hann í ræðu sinni á fundinum.

Sigurgeir Brynjar Kristgeirsson, framkvæmdastjóri Vinnslustöðvarinnar, fór yfir áhrif fyrirhugaðra breytinga á veiðigjöldum á starfsemi fyrirtækisins í lok fundarins. Vísað er til þess að nánari umfjöllun um þá yfirferð verði birt á fréttasíðu félagsins á næstu dögum.

• Blogga um frétt