„Þarna var góð veiði í bongóblíðu“

Veiðar hafa gengið vel hjá Bergi VE og Vestmannaey VE og lönduðu togararnir fullfermi í Grindavík síðastliðinn laugardag og aftur mánudag en þá í Vestmannaeyjum

Í færslu á vef Síldarvinnslunnar segir Jón Valgeirsson, skipstjóri á Bergi, að mest hafi verið um þorsk þegar landað var síðastliðinn laugardag en einnig eitthvað af ýsu. „Sá afli var allur tekinn á Sannleiksstöðum. Eftir löndun var strax haldið til veiða á ný. Eitt hol var tekið á Sannleiksstöðum en þar var of mikill þorskur í aflanum. Þá færðum við okkur á Holshraun og þar fékkst ýsa, dálítill þorskur og langa með. Síðan var landað í Eyjum. […] Það hefur verið fínasta veiði og svei mér þá ef veiðin er ekki að aukast á ýmsum stöðum,” segir Jón.

Birgir Þór Sverrisson, skipstjóri á Vestmannaey, kveðst í færslunni einnig sáttur við aflabrögðin. „Það var mest þorskur sem við lönduðum í Grindavík á laugardaginn en hann fékkst suður af Þorlákshöfn. Síðan var haldið beint á Holshraun og og þar fékkst fínasti afli; ýsa, langa og þorskur. Þarna var góð veiði í bongóblíðu. Þetta voru tveir stuttir túrar og það er svo sannarlega ekki yfir neinu að kvarta. Hér um borð eru menn bara brattir.”

• Blogga um frétt