Þórunn Ingólfsdóttir lét af störfum í fiskvinnsluhúsi ÚA eftir langan og farsælan feril. Þórunn segist kveðja sátt en nú taki við nýr kafli í lífinu. Tilkynnt var um starfslok Þórunnar í færslu á vef Samherja.

Leið Þórunnar lá úr Skorradal í Borgarfirði og norður í land 1974 þegar hún sótti um starf í súkkulaðiverksmiðjunni Lindu á Akureyri. Um áratug síðar varð hún fastráðin hjá K. Jónssyni og hefur allar götur sína starfað hjá ýmsum fyrirtækjum á Fiskitanganum á Akureyri. Til að mynda vann hún um tíma í rækjuverksmiðjunni Strýtu og Útgerðarfélagi Akureyringa en hún lýkur starfsævinni hjá Samherja, nú 71 árs gömul.

„Satt best að segja datt mér ekki í hug að Fiskitanginn á Akureyri yrði minn starfsvettvangur svona lengi. Hérna hefur mér liðið vel, enda næg og stöðug vinna. Ég hef alla tíð unnið mikið og finnst yfirleitt gaman í vinnunni, sérstaklega þegar upp koma tarnir. Slíkt var algengara á árum áður, núna getur fólk yfirleitt gengið út frá stöðugum vinnutíma.“

Þórunn var kvödd með virktum á síðasta degi. Ljósmynd/Samherji

Þórunn segist hafa tekið þá ákvörðun um áramótin að nú væri kominn tími til að láta af störfum. Henni hafi þótt skynsamlegra að hætta með hækkandi sól þegar vorið heldur innreið sína en að bíða eftir haustskammdeginu.

„Lífið er ekki bara vinna, ég er orðin 71 árs og heppin að heilsan er góð. Ég er mikið fyrir hreyfingu og útivist og er með ýmis plön í kollinum, Austurríki hefur til dæmis alltaf heillað mig, enda stórfenglegt að stunda fjallgöngur í Ölpunum í góðra vina hópi. Núna er þessum kafla í lífi mínu sem sagt lokið og við tekur sá næsti. Ég kveð ÚA og Samherja sátt og held glöð út í lífið,“ segir Þórunn Ingólfsdóttir.

Tengdar fréttir

Fólkið í sjávarútvegi

„Mér líður vel með þessa ákvörðun“

• Grindavíkurfílingur í vestanátt á Álftanesi
• Frumkvöðull með smitandi áhuga
• Lenti aldrei í alvarlegum óhöppum
• „Auðvitað fylgir því ákveðinn söknuður“

» Fleiri tengdar fréttir

• Blogga um frétt