Stjórn Vestfjarðastofu lýsir yfir þungum áhyggjum af frumvarpi ríkisstjórnarinnar um hækkun á veiðigjaldi og væntanlegum áhrifum þess á atvinnulíf og samfélög á Vestfjörðum. Þetta kemur fram í tilkynningu sem send var á mbl.is.

Stjórnin segir jafnframt að miðað við þær forsendur sem liggja að baki breytingu á veiðigjaldi megi telja ljóst að áhrifin verði mjög íþyngjandi og koma afar hart niður á litlum og meðalstórum bolfiskútgerðum. Á Vestfjörðum eru eingöngu litlar og meðalstórar útgerðir í bolfiskveiðum og vinnslu.

Stjórnin vísar í greiningu Deloitte og vestfirskra sjávarútvegsfyrirtækja á ársreikningum þeirra og segja áformin óásættanleg með tilliti til mikillar skerðingar á samkeppnishæfni og framlegð þessara sjávarútvegsfyrirtækja. Slíkur skortur á samkeppnishæfni kemur niður á endurnýjun á tækjabúnaði og fjárfestingu í framþróun, nýsköpun og þjónustukaupum. 

Skora á stjórnvöld að bregðast við

Þá lýsir stjórnin því yfir að þrátt fyrir að frítekjumark hafi verið hækkað falli sú hækkun í raun niður vegna aukins þunga í gjaldtöku á þorsk og ýsu í nýjustu breytingum frumvarpsins. Stjórnin krefst þess að misræmi milli útreikninga ráðuneytis og SFS verði gert skýrt til þess að hægt sé að treysta útreikningum vegna áhrifa af frumvarpinu.

Að lokum skorar stjórn Vestfjarðarstofu á stjórnvöld að bregðast hratt við og endurskoða enn frekar tillögu sína um hækkun á veiðigjaldi þannig að tekið verði tillit til réttmætra áhyggja atvinnulífs og sveitarfélaga á Vestfjörðum. „Það er lágmarkskrafa að áhrifin af hærra veiðigjaldi á samfélög á Vestfjörðum verði könnuð með ítarlegri hætti áður en lengra er haldið,“ segir í yfirlýsingunni.

Tengdar fréttir

Veiðigjöld

Veiðigjaldafrumvarpi vísað til atvinnuveganefndar

• Atkvæðagreiðsla á mánudag
• Þórunn: Ljúka umræðunni á morgun
• „Sá sem notar greiðir fyrir“
• Grímur: „Siðferðisleg yfirlýsing“

» Fleiri tengdar fréttir

• Blogga um frétt