Ánægður með síðasta kolmunnatúrinn

„Það var ágætis kropp. Við vorum að veiðum austnorðaustur af Færeyjum og aflinn fékkst í átta holum,“ segir Hálfdan Hálfdanarson skipstjóri á Berki NK um síðasta kolmunnatúr áhafnarinnar í bili. Börkur kom til hafnar í Neskaupstað í nótt með 3.200 tonn af kolmunna úr færeyskri lögsögu.

Í færslu á vef Sídlarvinnslunnar segir Hálfdan að það fengust um 250 til 600 tonn í holi og að dregið var í um tíu til sautján tíma.

„Þetta er fínasti fiskur sem þarna er á ferðinni. Það voru ekki mörg íslensk skip á miðunum. Þarna voru Síldarvinnsluskipin og Hákon. Færeysk, norsk og rússnesk skip voru nokkur og svo var grænlenska skipið Polar Amaroq þarna. Það er rúmur mánuður síðan þessi vertíð í færeysku lögsögunni hófst og hún hefur gengið býsna vel. Það hefur bæði verið gott veður og góð veiði. Það verður búið að landa úr skipinu í kvöld og þá er næst á dagskrá að þrífa og gera klárt fyrir næsta úthald sem er makrílúthaldið. Kolmunnaveiðum hjá okkur er semsagt lokið í bili. Ég held að menn geri ráð fyrir að haldið verði til makrílveiða einhvern tímann eftir miðjan júní,“ segir Hálfdan.

Fram kemur að Barði og Beitir eru enn á kolmunnaveiðum í færeysku lögsögunni.

• Blogga um frétt