Fjölbreytt verkefni frumkvöðla kynnt

Í Nýsköpunarvikunni sem haldin var í Reykjavík 12.–16. maí stóð Íslenski sjávarklasinn fyrir viðburði þar sem tíu frumkvöðlar kynntu fyrirtæki sín en þau vinna að margvíslegum nýsköpunarverkefnum sem tengjast bláa hagkerfinu. Nýsköpunarvikan er alþjóðlegur viðburður þar sem fyrirtæki og frumkvöðlar standa að fyrirlestrum, kynningum og öðrum uppákomum sem tengjast nýsköpun með einum eða öðrum hætti.

Vel var mætt á viðburð sjávarklasans sem haldinn var á bryggjunni á Grandanum en fyrirtækin tíu kynntu þar fjölbreytt verkefni. Meðal annars var sagt frá þróun ljóstækni til veiða, notkun gervigreindar til að spara olíu við siglingar og fiskileit, frumuræktun á fiski og gæðakerfi fyrir fiskvinnslu, svo fátt eitt sé nefnt.

Íslenski sjávarklasinn hefur verið starfræktur frá árinu 2011 en markmið hans er að tengja saman frumkvöðla, fyrirtæki og vísindamenn til að efla nýsköpun í bláa hagkerfinu og stuðla að samstarfi þvert á atvinnugreinar.

• Blogga um frétt