Tuttugu og þrír sérfræðingar útskrifaðir

Tuttugu og þrír sérfræðingar útskrifuðust úr Sjávarútvegsskóla GRÓ 21. maí. Nemendurnir eru frá fjórtán löndum: Kúbu, Gana, Síerra Leóne, Líberíu, Angóla, Malaví, Úganda, Tansaníu, Keníu, Srí Lanka, Kína, Indónesíu, Papúa Nýju-Gíneu og Salómonseyjum. Í útskriftarhópnum eru tólf konur og ellefu karlar, en í heimalöndum sínum starfa þau sem sérfræðingar á ýmsum sviðum tengdum sjávarútvegi, svo sem á sviði stofnstærðamats, fiskveiðistjórnunar, fiskeldis eða gæðastjórnunar í fiskvinnslu. Hópurinn hefur dvalið á Íslandi við nám síðustu sex mánuði í boði íslenskra stjórnvalda sem hluti af alþjóðlegri þróunarsamvinnu við Ísland.

Sjávarútvegsskóli GRÓ var stofnaður sem hluti af Háskóla Sameinuðu þjóðanna en hefur síðan 2020 verið rekinn undir hatti UNESCO. Skólinn býður upp á nám og vinnustofur á ýmsum sviðum tengdum sjávarútvegi og styður nemendur til frekara náms við íslenska háskóla. Í ár var fimmhundraðasti nemandinn útskrifaður frá skólanum.

• Blogga um frétt