60 ára sjómannsferli lokið

Eftir 60 farsæl ár á sjó hefur Páll Halldórsson látið af störfum sem skipstjóri á togaranum Páli Pálssyni ÍS 102. Þetta kemur fram í tilkynningu á vef Hraðfrystihússins Gunnvarar. Páll lagði að höfn 10. júní eftir síðasta túrinn og hefur nú sett skipstjórahúfuna á hilluna.

Páll er borinn og barnfæddur í Hnífsdal. Honum er sjómennskan í blóð borin en föðurafi hans var Páll Pálsson, útvegsbóndi í Hnífsdal. Togarinn Páll Pálsson er einmitt nefndur eftir honum. Snemma beygðist krókurinn og Páll Halldórsson fór á sjóinn í júní 1965 á 100 tonna stálbáti sem bar sama nafn og síðasti báturinn sem hann stýrði, Páll Pálsson. Þá var ekki aftur snúið og Páll kom víða við á ferli sínum.

Þegar Páll lítur um öxl segist hann skilja sáttur við. Vinnan hafi veitt honum ánægju og hann sjái ekki fyrir sér að hann hafi alveg skilið við sjóinn sem hefur verið hans starfsvettvangur í 60 ár. Ekki sé loku fyrir það skotið að hann taki einn og einn túr ef þörf sé á.

• Blogga um frétt