Sjávarhiti hefur hækkað sunnan og suðaustan við landið samanborið við hitatölur frá árunum 1991-2020. Við Siglunes mældist hæsta hitastig sem mælst hefur, eða 7,8°C. Var það 3,2°C yfir meðaltali viðmiðunartímabilsins 1991-2020 en útlit er fyrir að hlýr og selturíkur sjór streymi inn á landgrunnið norðan til sem veldur því að hiti og selta er yfir meðaltali á svæðinu. Þessar niðurstöður fengust úr árlegum vorleiðangri Hafrannsóknastofnunar sem farinn var 13.-26. maí.

Steingrímur Jónsson, haffræðingur hjá Hafrannsóknastofnun, segir að áhugaverðast hafi verið að sjá hvað heiti straumurinn norðan við landið er á miklu dýpi. „Já, það sem mér fannst nú athyglisverðast var þessi hiti þarna fyrir norðan land,” segir Steingrímur. „Þar var þessi hitabylgja þarna í yfirborðinu. Það er voða erfitt að spá eitthvað út frá henni, en hann náði alveg djúpt niður, þessi aukni hiti þarna á fyrir norðan land og norðvestan.” Steingrímur segir að yfirborðið hafi verið óvanalega heitt en það útskýrist að einhverju leyti af veðurskilyrðum þegar mælingar fóru fram. Veðrið hafi hins vegar ekki áhrif dýpra ofan í sjóinn og því liggi aðrar ástæður að baki.

Segir hlýjan straum gleðiefni

Aðspurður hvort ástæða sé til að hafa áhyggjur svarar Steingrímur því til að hann myndi frekar kalla þetta gleðiefni. „Þetta þýðir að það er meira af heitum sjó sem streymir hérna upp að landinu fyrir sunnan land sem er að komast inn á Norðurmið. Þá eru betri lífsskilyrði. Það koma meiri næringarefni með þessum sjó og það þýðir bara að lífríkið er miklu öflugra.”

Steingrímur tekur fram að fleiri mælinga sé þörf áður en hægt verður að segja til um hvort þessi hlýi straumur sé tilfallandi eða hvort hans verði vart í framtíðarmælingum. Mögulega myndi það hafa einhver áhrif á fiskistofna en ekki er enn þá ljóst hver áhrifin yrðu. „Við förum náttúrulega reglulega í leiðangra þar sem við mælum þetta, en það er ekki nema þrisvar, fjórum sinnum á ári,” segir Steingrímur. „Sjórinn tekur nú svolítið langan tíma að breytast, miklu lengri en veðrið.”

Þessi vorleiðangur var sá fyrsti sem farinn var á nýju rannsóknarskipi stofnunarinnar, Þórunni Þórðardóttur. Leiðangurinn er farinn á hverju ári til að viðhalda reglubundinni vöktun sem Hafró hefur sinnt frá árinu 1950 á ástandi sjávar, næringarefnum, ólífrænu kolefni, plöntusvifi og dýrasvifi við Ísland.

Tengdar fréttir

Hafrannsóknastofnun

Lýsa efasemdum um ráðgjöf Hafró

• Þjóðarbúið verði af 6-7 milljörðum
• Þórunn Þórðardóttir bilaði
• Vísitala minnkar en mikið af stórum þorski
• Fyrsta marsralli Þórunnar lokið

» Fleiri tengdar fréttir

• Blogga um frétt