Bergur heitir aftur Bergey

Ísfisktogarinn Bergur hefur endurheimt upprunalegt nafn sitt og heitir nú aftur Bergey, að því er segir í tilkynningu á vef Síldarvinnslunnar. Breytingin er kærkomin þeim skipverjum sem aldrei tókst að laga sig að nýju nafni og kölluðu skipið iðulega Bergey sín á milli.

Skipið var smíðað árið 2019 í Noregi fyrir Berg - Hugin sem er dótturfélag Síldarvinnslunnar og gerir út frá Vestmannaeyjum. Árið 2020 keypti Síldarvinnslan Berg ehf. í gegnum Berg - Hugin og í kjölfarið, eða árið 2020, eignaðist Bergur ehf. skipið og var það þá endurnefnt Bergur. Nú hafa félögin Bergur og Bergur - Hugin þó verið sameinuð og af því tilefni fékk skipið aftur sitt upprunalega nafn.

Jón Valgeirsson skipstjóri segir almenna ánægju ríkja um breytinguna. „Sumir í áhöfninni áttu erfitt með að venjast Bergsnafninu og nefndu skipið ávallt Bergey,” segir hann. „Ég heyri ekki annað en að menn hér um borð séu mjög sáttir við þessa breytingu. Bergur fór sem sagt upp í slippinn en Bergey kom niður. Við höldum til veiða á morgun frá Akureyri og ég geri ráð fyrir að við förum austur fyrir land. Nú er systurskipið Vestmannaey komið hingað til Akureyrar og mun fara hér í slippinn.”

• Blogga um frétt