Guðmundur hættir sem formaður SFS

Guðmundur Kristjánsson forstjóri Brims hefur sagt af sér sem formaður Samtaka fyrirtækja í sjávarútvegi. 

Guðmundur tilkynnti SFS um afsögn sína á fundi í framkvæmdaráði í dag. Í tilkynningu frá honum segir að ástæðan sé sú að áherslur hans í starfi samtakanna njóti hvorki stuðnings Heiðrúnar Lindar Marteinsdóttur framkvæmdastjóra SFS né félaga sinna í forystu samtakanna.

Telur hann því best fyrir samtökin að hann segi sig úr forystu þeirra, að því er fram kemur í tilkynningu sem send var á fjölmiðla.

„Ég tel það hlutverk samtakanna að fræða og upplýsa almenning og fulltrúa þeirra á hverjum tíma í stjórnmálum og opinberri stjórnsýslu um aðstæður til verðmætasköpunar í sjávarútvegi,“ segir í tilkynningunni.

„Til þess þarf öflugt samtal og samstarf við stjórnvöld og faglegar stofnanir sem grundvallast á gagnkvæmri virðingu og þeirri sannfæringu að það sem er gott fyrir íslenskan sjávarútveg er gott fyrir samfélag okkar í heild. Slíkt samtal á sér ekki stað í dag. Í ljósi þess er það áhyggjuefni að stjórnvöld stefna nú á umtalsverðar breytingar á rekstrarumhverfi sjávarútvegs á Íslandi án þess að fyrir liggi sameiginlegur skilningur allra þeirra sem málið varðar á því hvaða afleiðingar breytingarnar hafa í för með sér,“ segir þar enn fremur.

Guðmundur sinnti embættinu aðeins í rúma tvo mánuði en hann var kjörinn formaður SFS á aðalfundi félagsins í byrjun apríl.

Frétt af mbl.is

Guðmundur Kristjánsson nýr formaður SFS

• Blogga um frétt