Ufsamok á Ólafsvík

Strandveiðibáturinn Birta SH lenti í ufsamoki og var með yfir 2 tonn af ufsa. Þar að auki náði báturinn skammtinum af þorski og var heildarafli bátarins 3,2 tonn. Emanúel Magnússon skipstjóri Birtu hefur átt gott sumar að sögn Alfons Finnssonar, strandveiðimanns og fréttaritara Morgunblaðsins á Ólafsvík.

Birta rær frá Ólafsvík en Alfons segir það hafa gengið vel í sumar. „Það gengur fínt, það er bara svolítið langt að sækja,“ segir Alfons. Veðrið í sumar hefur ekki leikið við strandveiðimenn á Ólafsvík þó það sé gott í dag „Það hreyfist ekki hár á höfði, allavega ekki á mér,“ segir Alfons. 

Alfons er sjálfur á strandveiðum og var á leið til hafnar þegar blaðamaður náði tali af honum. „Menn eru jákvæðir og bjartsýnir,“ segir hann um gengi strandveiðanna í sumar en honum gekk vel á veiðunum í dag og náði skammtinum af þorski. 

• Blogga um frétt