Í bréfinu er lýst áhyggjum smábátamanna yfir því að ekki hefur enn verið gefin út reglugerð um línuívilnun sem að öðru jöfnu hefði átt að liggja fyrir 1. september sl. Ráðherra gaf reyndar út reglugerð í lok ágúst sem mælti fyrir um aflaheimildir til Byggðastofnunar, en lét ógert að setja reglugerð um línuívilnun, almennan byggðakvóta og rækju- og skelbætur. Hefur ráðherra sagst ætla að taka sér umþóttunartíma til næstu áramóta. Hafa útgerðarmenn víða um land lýst áhyggjum sínum vegna þessa.

Örn Pálsson Ljósmynd/Aðsend

„Ég hef verulegar áhyggjur af framtíð línuútgerðar smábáta. Flestir þeirra eru með litlar aflaheimildir og því er nauðsynlegt að þeir geti drýgt þær með línuívilnun og leigukvóta. Verði þær leiðir lokaðar, þá sjá menn sæng sína uppreidda,“ segir Örn Pálsson, framkvæmdastjóri Landssambands smábátaeigenda, í samtali við Morgunblaðið og nefnir að þetta eigi sér engin fordæmi í sögu línuívilnunarinnar.

Þeim bátum sem notið hafa línuívilnunar hefur farið fækkandi á umliðnum árum. Voru þeir 54 á síðasta fiskveiðiári, en voru 300 talsins fiskveiðiárið 2004/2005 að því er fram kemur í bréfinu. Þá hefur byggðarlögum, þaðan sem bátar eru gerðir út og njóta línuívilnunar, fækkað úr 50 í 30 á sama tímabili.

Línuívilnun er þannig útfærð að bátar sem gerðir eru út til línuveiða njóta umbunar og fá afslátt af aflamarki við löndun. Þannig er báti ívilnað með 750 kílóum af þorski við löndun á 5 tonnum þorsks.

Þorskafli til línuívilnunar hefur sætt skerðingum á umliðnum árum, en á síðasta fiskveiðiári var einungis 800 tonnum þorsks varið til ívilnunar sem var rúmum þriðjungi minna en fiskveiðiárið á undan. Voru heimildir síðasta fiskveiðiárs uppurnar í byrjun mars.

Í bréfinu segir að allt skipulag veiðanna hafi tekið mið af því að línuívilnun kæmi til framkvæmda 1. september sl. eins og undanfarna tvo áratugi.

„Það eru því gríðarleg vonbrigði að enn hafi ekki verið gefin út reglugerð um heimildir til línuívilnunar í einni einustu þeirra sex tegunda sem hún tekur til. Eins mánaðar biðtími hefur valdið vandræðum og vakið spurningar um áframhaldandi rekstraröryggi viðkomandi útgerða,“ segir þar.