Fyrsta skarlatsrækjan í tvo áratugi

Hrafn Sveinbjarnarson GK var nýlega við veiðar djúpt suðaustur af landinu og veiddi þar óvanalega stóra rækju. Þetta kemur fram á vef Hafrannsóknastofnunar.

Rækjan var send til rannsókna og í ljós kom að hér var á ferðinni svokölluð skarlatsrækja (Aristaeopsis edwardsiana). Sú hefur aðeins örsjaldan áður veiðst við Ísland en Hafrannsóknastofnun skráði tíu tilvik þar sem skarlatsrækja fannst hér við land á árunum 1996-2005. Þetta er því fyrsta skarlatsrækjan sem veiðst hefur á íslensku hafsvæði í tvo áratugi.

Ekki er erfitt að sjá hvaðan skarlatsrækjan fékk nafn sitt en hún er fagurrauð á litinn. Ljósmynd/Hafrannsóknastofnun: Svanhildur Egilsdóttir

Ein stærsta rækjutegund heims

Skarlatsrækju er lýst nánar í frétt Hafrannsóknastofnunar: „Skarlatsrækja er stór, dökkrauð djúpsjávarrækja og getur orðið allt að 30 cm löng. Hún er ein af stærstu rækjutegundunum sem þekkjast í heiminum. Hún lifir helst á leirbotni á 400 til 900 m dýpi en getur fundist á allt að 1.850 m dýpi. Hún heldur sig aðallega á leirbotni og finnst í tempruðum og heitum sjó, frá ströndum Spánar suður til Suður-Afríku. Því er fundur hennar hér við Ísland sérstakur þar sem hún er töluvert langt frá sínu hefðbundna útbreiðslusvæði.“

• Blogga um frétt